1SQ-ի կողմից կառավարվող երկրի ամենախոշոր պրոյեկտներից Dalan Technopark-ը նախագծերի կառավարման աշխարհահռչակ մասնագետների ուշադրության կենտրոնում է։
Օրերս Տեխնոպարկի շինհրապարակ էին այցելել PMI Հայաստանի թիմը և Պիեր Լե Մանը՝ Project Management Institute-ի նախագահն ու գլխավոր գործադիր տնօրենը։
Պիեր Լե Մանը Հայաստան էր ժամանել PMI Armenia-ի կողմից կազմակերպվող Նախագծերի կառավարման համաժողովին և մրցանակաբաշխությանը մասնակցելու նպատակով, ինչպես նաև Դալանի գործընկեր Վի Ջի Էմ-ի հրավերով այցելել էր Տեխնոպարկի շինարարական հրապարակ։
Այցի ընթացքում Դալան Տեխնոպարկի գործառնական տնօրեն Հայկ Տեր Տաճատյանը և թիմի անդամները խոսեցին նախագծի բազմաշերտության մասին, ընդգծեցին միջազգային ստանդարտներով աշխատատեղեր ստեղծելու կարևորությունը։
Դալան Տեխնոպարկը համարվում է Հայաստանի կառուցապատման ոլորտի եզակի նախագիծ, որը պրոյեկտների կառավարման տեսանկյունից առանձնանում է կիրառվող մեթոդներով, գործիքակազմով և կառավարման մշակույթով։
Նախագծի ամբողջական կառավարումն իրականացնող Մեկ Էս Քյու ընկերության տնօրեն Գոհար Սաղոյանը, ողջունելով հյուրերին, իր խոսքում նշեց․
<< Մենք առաջինն էինք Հայաստանի կառուցապատման ոլորտում, որ դեռևս 2018թ-ին ներդրեցինք կառուցապատման նախագծերի կառավարման գաղափարը և զարգացնելով այն տարիների ընթացքում, այսօր արդեն կառավարում ենք երկրի ամենամասշտաբային նախագծերից մեկը և ներկայացնում այն միջազգային հանրությանը։
Մենք համակարգում ենք բոլոր ներգրավված թիմերի աշխատանքները, իրականացնում ենք գործընթացների ամբողջական կառավարում նախաշինարարական և շինարարական փուլերում՝ իրականացնելով իրավաբանական, ֆինանսական և հաշվապահական սպասարկում։
Հպարտ ենք, որ կարող ենք ներկայացնել Դալան Տեխնոպարկը որպես Կառուցապատման ոլորտի նախագծերի կառավարման լավագույն օրինակներից մեկը Հայաստանում>>։
Դալան Տեխնոպարկը ոչ միայն կառուցապատման ոլորտի խոշոր և նշանակալի ներդրումային նախաձեռնություն է, այլև պրոֆեսիոնալ նախագծերի կառավարման առաջատար օրինակ։ Նման այցերը հնարավորություն են տալիս Հայաստանի փորձը ներկայացնելու միջազգային համայնքին և խթանելու մասնագիտական երկխոսությունը։
